Tuesday, 3 May 2011

عمر طاهر


ان كنت من عشاق الكتابة الساخرة .., فأنت بالتأكيد تدرك قيمة كاتب اسمه"عمر طاهر"...!!
ان كنت من قراء جريدة المصري اليوم ..فأستطيع ان أجزم ان اول ما تفعله عندما تكون الجريدة بين يديك هو قراءة عمود عمر طاهر اليومي في الصفحة الأخيرة...!!
على الرغم ان هذه المدونة معنية بالأساس بالكتب و ليس بالكُتاب...و لم أفكر يوما في ان اكتب موضوع منفرد عن كاتب بعينه..., الا ان "عمر طاهر" و روعة اسلوبه و جمال كتبه جعلني أخرج عن "قواعد" هذه المدونة من أجله....و هو بالقطع يستحق.
و الحقيقة انني لست صاحب هذه الفكرة وانما الفكرة و الموضوع ككل من بنات أفكار صديقي الدكتور محمد مشهور...الذي ينافسني بشدة في حب هذا الكاتب بل و الولع به...و ان كان د.مشهور يزيد عني في انه يشترك مع عمر طاهر في صفة أحمد الله عز و جل انني انا شخصيا لا أتصف بها...و هي انهما كلاهما (زملكاوي)...!!
و كلاهما مش أي زملكاوية و لكنهما (زملكاوية حتى النخاع)....كلاهما (زملكاوي...أصلي) و...كلاهما (مصري....أصلي)..!!
و الأن مع ماكتبه صديقي د.محمد مشهور بقلبه قبل قلمه عن كاتبي الرائع (عمر طاهر).......
بالرغم من المدونة مخصوصة للكتب بس أنا مش هاروح بعيد أنا هتكلم عن كاتب أنا عارف أن ده هيبقى استثناء بس أصل الكاتب ده يا جماعة استثنائى
(عمر طاهر)
الحقيقة مش عارف أوصفك بأيه
أصيع كاتب فى مصر
الكاتب الجاحد
بدأت حكاية عمر طاهر معايا من أول كتاب ليه وهو ( شكلها باظت) اسم الكتاب بصراحة أغرانى انى لازم أقرا اللى جواه يا الراجل ده بيشتغلنا بعنوان الكتاب يا اما فى حاجة جديدة موهبة جديدة هتفاجأنى 
وكانت المفاجأة ساعة من الضحك والمتعة والدهشة والفلسفة والذكريات الحلوة ومن بعدها أصبح عمر طاهر بالنسبة لى ادماااااااااااااااااااااااان بشمشم على مقالاته على حواراته على ألبوماته على سلاطاته على باب غنوجه
المدهش فى عمر طاهر أنه دائما يرى الأشياء من وجهة نظر مختلفة تماما عن وجهة نظر الجميع لكن عندما تقرأ وجهة نظره تشعر بأنه يكتب عنك عن أحاسيسك عن مشاعرك الراجل ده يا جماعة بيكتبنى 
عمر له من الألبومات 7 لبومات 1-شكلها باظت 
2-كابتن مصر واللى ممكن تعتبره الجزء التانى من شكلها باظت و بداية الكتابات اللى بتبدى ب أشهر 10 حاجات فى مصر , 10 فروق بين الراجل والست , ازاى تعرف انك فى مصر حاجات شكل كدة يعنى
3- ابن عبد الحميد الترزى ( طب بالذمة فى حد يقدر ينزل كتاب اسمه كدة) ملخص عن أحوال مصرالسينمائية من أول حسين صدقى فتى الشاشة الأول لحد محمد سعد بشكل جديد جدا جدا يفطسك من الضحك على السينما بتاعتنا الا فى فترات محددة
4-جر ناعم وده بالنسبة لى أجمل ألبوماته هو خليط من شعر .. نثر .. قصة قصيرة أوى .. وحاجات تانية كتير وهو كتاب بجد يجرك معاه جر ناعم أوى لغاية لما تخلصه خصوصا قصة زواج أخته (الحزام البنى)
5- رصف مصر مجموعة مقالات اتنشرت فى الدستور كان عمربيشتغل فيها قبل مايروح المصرى اليوم من أجمل ماكتب عمر خصوصا مناجاته لربنا بلغة جيلنا وكمان مقالة مطلوب عروسة مقالة تدرس لأى شاب عايز يتجوز ولأى حد عايز يتجوز تانى
6-زملكاوى بيتهيألى الجواب بيبان من عنوانه و كان أحمد سمير كتب عنه فى المدونة 
7- برما يقابل ريا وسكينة ده بقى اخر عنقود عمر طاهر برضة مجموعة مقالات اتنشرت فى الدستور عن شخصية خيالية بس لما تقراها هتحس ان برما ده انت عارفه أنا وقعت من الضحك فى الكتاب ده

مش هاعرف أتكلم أوى عن كتب عمر لأن كتاباته سهلة أوى لدرجة أنك تحس أنك ممكن تكتب حاجات زى دى وأحسن بس لما تيجيى تحاول هتلاقى الموضوع صعب جدا جدا السهل الممتنع 

عمر طاهر أكاد أزعم أنه بيزود توزيع أى جريدة بيكتب فيها لو كنت من عشاقه أكيد أول حاجة هتعملها لما تفتح الجورنال بتقول كاتب ايه النهاردة يا عمر 

عمر طاهر انت كاتب جاحد وكاتب الجيل وانت حد جميل

3 comments:

  1. ؛؛
    شوقتنا لقراءة كتبه كلها

    ReplyDelete
  2. انا قرأت كتاب جر ناعم وهو اول كتاب اقرأه لعمر طاهر على الرغم من اني قرأت له عدة مقالات ، تعرفت عليه من خلال ثورة مصر ..
    وان شاء الله اقرأ باقي كتبه ..
    دمت بخير

    ReplyDelete
  3. انا مسميه ميسي الصحافة المصرية

    ReplyDelete